Улар менән ауыл йәмле
Фатима менән Сәрүәр Һибәтовтар Рыскужа ауылында хөрмәткә лайыҡ ғаиләләрҙән һанала.
Ғаилә башлығы хаҡлы ялға сыҡҡансы Амангилде урта мәктәбендә балаларға географиянан белем бирҙе. Күп йылдар пропагандист булып эшләне, шулай уҡ «Башҡортостан» гәзитен таратыуға ҙур өлөш индергәне өсөн редакцияның бүләген ҡәҙерләп һаҡлай. Сәрүәр ағайҙың тырыш хеҙмәтен юғары баһаланылар – ул «Рәсәйҙең мәғариф отличнигы» тигән маҡтаулы исемде йөрөтә.
Фатима апай - шиғри күңелле әсә. Уның ике шиғырҙар китабы донъя күрҙе. Һибәтовтар районыбыҙҙа "Өлгөлө ғаилә” исеменә лайыҡ булды.
Улар бына тигән өс ул тәрбиәләп үҫтерҙе. Айбулат менән Йәүҙәт, аталарының юлын дауам итеп, райондың Ҡаҙмаш урта мәктәбендә балаларға ғилем серҙәрен аса, ә Фәрит урман техникумын тамамланы. Улар менән ауылыбыҙ йәмле, - ти Рыскужа халҡы Һибәтовтар ғаиләһе хаҡында.
Рәйлә Зәйнуллина Әбйәлил районы
Башҡортостан газетаһының 2012 йыл 8 февраль һанынан
| 
